«Աբովյան-Կոմիտաս-Թումանյան հոգևոր-մշակութային խաչմերուկում» խորագրի ներքո թանգարանում հիշատակվեց երկու հայ մեծերի՝ Կոմիտասի և Թումանյանի ծննդյան 150-ամյակները: Միջոցառմանը ներկայացվեցին հետաքրքիր զեկույցներ: Առաջին բանախոսն էր Հովհ. Թումանյանի թանգարանի տնօրեն Անի Եղիազարյանը, որը մասնավորապես անդրադարձավ Աբովյան-Թումանյան ստեղծագործական և գափարական առնչություններին: Հաջորդիվ բանախոսեց Առնո Բաբաջանյանի անվ. երաժշտամանկավարժական քոլեջի ուսանող Վահե Գևորգյանը: Վերջինս խոսեց Կոմիտասի, Աբովյան-Կոմիտաս կապի և Աբովյանի երաժշտական գործունեության մասին: Ասմունքող Նարեկ Մարգարյանը ներկայացրեց «Հովհաննես Թումանյանը Խաչատուր Աբովյանի արձանի մասին» և «Կոմիտասը և Աբովյանի լուսանկարը» հոդվածների գեղարվեստական ընթերցումներ և թումանյական ասմունք: Միջոցառումն ամփոփվեց կոմիտասյան երգերով՝ «Խարույկ» բենդի կատարմամբ: Թանգարանի կողմից միջոցառման մասնակիցներին տրվեցին շնորհակալագրեր և հուշանվերներ:
