Извините, эта страница доступна только на Армянский For the sake of viewer convenience, the content is shown below in the alternative language. You may click the link to switch the active language.
ՇՈՒՆՉԴ ՏՈՒ՛Ր, ՀՈԳԻ՛Դ, ԲԱՅՑ ՔՈ ՀԱՅՐԵՆԻՔ
ՄԻ ՏՈՒՐ ԹՇՆԱՄՅԱՑ…
Սեպտեմբերի 23-ին Խ. Աբովյանի տուն-թանգարանում տեղի ունեցավ ՀՀ անկախության 26-ամյակին նվիրված միջոցառում «Խ. Աբովյանի երազած անկախ Հայաստանը» խորագրով: Պատահակ չէր ընտրված խորագիրը, քանի որ մեծ լուսավորչի ամբողջ կյանքի և կրթամշակութային գործունեության հիմնական նպատակն ու պայքարը եղել է Հայաստանը և հայ ժողովրդին տեսնել ազատ, անկախ, բարեկեցիկ և կրթված:
Միջոցառման հյուրերն էին Հ. 106 «Վարդանանց ասպետներ» հիմնական դպրոցի ուսմասվար Գոհար Բաղդագուլյանը, պատմ. ուսուցչուհի Լիլիթ Բաղդագուլյանը, մանկական կոլեկտիվի կազմակերպիչ Անահիտ Բալոյանը և «Հայկազունք» դհոլային համույթի գեղ. ղեկավար Կարեն Գևորգյանը:
Միջոցառումը մեկնարկեց թանգարանի տնօրեն Վ. Քոսակյանը: Իր խոսքում տնօրենը շնորհավորական ուղերձ հղեց ՀՀ անկախության 26-ամյակի կապացությամբ և ընդհանրական գծերով անդրադարձավ անկախության պատմությանը:
Այնուհետև թանգարանի հանրահռչակման և ցուցադրությունների բաժնի վարիչ Ա. Ստամբոլցյանը ներկայացրեց պատմական կարճ ակնարկ՝ «Անկախության ճանապարհը»:
Միջոցառման ընթացքում թանգարանի գլխ. ֆոնդապահ Մ. Բաղդասարյանը և գիտաշխատող Ս. Ավոյանը հանդես եկան զեկույցներով «Խ. Աբովյանի երազած անկախ Հայաստանը» խորագրի ներքո:
Միջոցառումը հագեցած էր նաև գեղարվեստական համարներով.
փայլուն ելույթներով հանդես եկան «Վարդանանց ասպետներ» Հ. 106 հիմնական դպրոցի սաները: Կյուրեղյան Հելենը ասմունքեց Հ. Շիրազի «Տիգրան Մեծի վրանները», «Միջազգային ասմունքի մրցույթ»-ի «Գրանդ պրի» մրցանակակիր Գյուլումյան Ժորան ներկայացրեց Սիլվա Կապուտիկյանի «Ոգեկոչություն» բանաստեղծությունը: Նույն դպրոցի սաների կողմից ներկայացվեցին նաև ազգագրական պարեր՝ «Փափուռի» և «Եռագույն»:
Ազդեցիկ էր միջոցառման վերջին համարը.
փայլուն և գերազանց կատարում «Հայկազունք» դհոլային համույթի կողմից: Նրանց կատարմամբ վայելեցինք «Մարտական» դհոլային կատարումը:
Միջոցառումը եզրափակվեց մեծն լուսավորչի խոսքերով՝ «Քանի բերնումս լեզու կա, փորումս սիրտ, ես լեղապատառ ձեն կտամ, էդ ո՞ւմ վրա եք թուր հանել, Հայոց մեծ ազգին չե՛ք ճանաչում»:
Միջոցառման ավարտին հանրահռչակման և ցուցադրությունների բաժնի վարիչ Ա. Ստամբոլցյանը տնօրենի անունից շնորհակալագրեր հանձնեց «Վարդանանց ասպետներ» հ. 106 հիմնական դպրոցի տնօրեն Մ. Վարդանյանին և «Հայկազունք» դհոլային համույթի գեղարվեստական ղեկավար Կ. Գևորգյանին՝ արդյունավետ և պատրաստակամ համագործակցության համար: Ինչպես նաև միջոցառման հյուրերին և մասնակիցներին թանգարանի կողմից հանձնվեցին նվերներ՝ աբովյանական հուշանվերների նոր շարքից՝ աբովյանական բլոկնոտներ, էջանիշներ, աբովյանական առակների և բայաթիների բացիկներ՝ նկարազարդումներով, հայերեն և անգլերեն լեզուներով:
Այնուհետև միջոցառման մասնակիցները շրջայց կատարեցին թանգարանի ցուցասրահում, որտեղ նրանք ծանոթացան մեծն լուսավորչի կյանքին, գործունեությանն ու ստեղծագործությանը:
Խ. Աբովյանի տուն-թանգարանը իր խորին շնորհակալությունն է հայտնում միջոցառման մասնակիցներին՝ «Վարդանանց ասպետներ» հ. 106 հիմնական դպրոցին, ի դեմս՝ տնօրեն Մ. Վարդանյանի և «Հայկազունք» դհոլային համույթին, ի դեմս՝ գեղարվեստական ղեկավար Կ. Գևորգյանի՝ թանգարանի միջոցառումներին պատրաստակամ, որակյալ և ակտիվ մասնակցության համար:
