Извините, эта страница доступна только на Армянский For the sake of viewer convenience, the content is shown below in the alternative language. You may click the link to switch the active language.
Ս/թ-ի սեպտեմբերի 6-ին և 7-ին, Խաչատուր Աբովյանի տուն-թանգարանում տեղի ունեցավ մեծանուն Լուսավորչի վերջերս վերականգնված արձանի հանրային ցուցադրության արարողությունը: Խ. Աբովյանի ծննդյան 215-ամյակի հոբելյանական տարվա շրջանակում սա մեծապես կարևորվող իրադարձություն էր, քանի որ մեկ դար անց, «Տաշիր» բարեգործական հիմնադրամի աջակցությամբ հնարավոր է դարձել վերականգնել Լուսավորչի արձանը և նոր ոգով ու շնչով հանձնել հանրությանը: Տուն-թանգարանի այգում ներկայացվեց արձանի պատմության վավերագրությունը:
«Տաշիր» բարեգործականի աջակցությամբ Թանգարանում իրագործվել է նաև Աբովենց բացօթյա գրադարանի ստեղծման և Թանգարանի այգու տեսահսկման նախագիծը: Այսուհետ այցելուները, պահպանելով սոցիալական հեռավորություն, կարող են ընթերցել գրքեր, վայելել հաճելի գրական-երաժշտական երեկոներ Խաչատուր Աբովյանի հայրական տան այգում:
ՀՀ ԿԳՄՍ նախարարի տեղակալ Նարինե Խաչատուրյանը ողջունելով Թանգարանի նախաձեռնությունը նշեց. «Բացօթյա գրադարան Հայաստանում, Երևանում հրաշալի միտք է և հրաշալի կատարում: Աբովենց այգում կարծում եմ շատ հաճելի կլինի ընթերցանությամբ զբաղվելը: Ես շատ ուրախ եմ,որ տուն-թանգարանն ունի հրաշալի տնօրենուհի, որը շատ լավ գաղափարներ է մեջտեղ բերում և ամենակարևորը՝ կարողանում է այդ գաղափարներն իրականացնել: Շնորհակալ եմ այն երիտասարդներին, ովքեր վերականգնեցին Խ. Աբովյանի բրոնզե արձանը, որ տևական ժամանակ վատ վիճակում էր գտնվում, և «Տաշիր» բարեգործական ընկերությանը, որը գնահատեց տնօրենի ջանքերը, նպատակը հասկացավ և օժանդակեց: Հույս ունեմ, որ այս գեղեցիկ, բացօթյա գրադարանը լեփ-լեցուն կլինի ընթերցողներով»:
Աբովենց այգու գրադարանի հանդիսավոր բացմանը հաջորդեց կոմպոզտոր Նիկոլ Գալանտերյանի «Հայտնի և անհայտ երգեր, ռոմանսներ, դուետներ» գրքի շնորհանդեսը (փոխադրումը և մշակումը Մարգարիտ Սարգսյանի): Թանգարանի տնօրեն Սյուզաննա Խոջամիրյանը հույս հատնեց, որ Աբովենց այգին այսուհետ կդառնա արվեստի, գրականության գործիչների հավաքատեղի, որտեղ պարբերաբար կկազմակերպվեն գրական-երաժշտական երեկոներ, ներկայացումներ, համերգներ: Միջոցառման ընթացքում ելույթ ունեցան օպերային արտիստներ Նարինե Անանիկյանը, Դիանա Հարությունյանը և Անդրանիկ Մալխասյանը: Երեկոյի կոնցերտմայստերն էր Մարգարիտ Սարգսյանը:
Արարողությանը ներկա էին նաև «Տաշիր» բարեգործական հիմնադրամի ներկայացուցիչներ և Էստոնիայի պատվավոր հյուպատոսը, ով Աբովենց բացօթյա գրադարանին գրքերի ծավալուն հավաքածու նվիրեց: