Մայիսի 31-ը հատկանշական ու խորհրդանշական օր էր թանգարանի համար: Տարիների ընդմիջումից հետո, Աբովյանների տոհմատան օջախը կրկին ծխաց: Կենդանացել էր Աբովենց տան երբեմնի հյուրընկալ միջավայրը։
Միջոցառումը բացման խոսքով մեկնարկեց թանգարանի ցուցադրությունների և հանրահռչակման բաժնի վարիչ Արևիկ Ստամբոլցյանը: Ողջույնի խոսքով հանդես եկան ՀՀ մշակույթի փոխնախարար Տիգրան Գալստյանը և թանգարանի տնօրեն Սյուզաննա Խոջամիրյանը:
Տեր Եսայի քահանան և Հովհաննես սարկավագը տոհմատանը կատարեցին Տնօրհնեքի ծիսակարգը, որից հետո վերագործարկվեց տոհմատան թոնիրը: Միջոցառման մասնակիցներին սպասվում էր համեղ հյուրասիրություն՝ թոնրի լավաշ, պանիր, չիր ու գինի: Միջոցառումը հագեցած էր նաև երաժշտական և պարային կատարումներով: Ելույթ ունեցան Գոռ Սուջյանը, Միքայել Ոսկանյանը, «Թմբաթա» խումբը, «Արեգ» ավանդական երգի ու պարի համույթը: Միջոցառումը եզրափակվեց ֆլեշմոբով՝ «Արեգ» համույթի և միջոցառման հյուրերի մասնակցությամբ: