Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.
Խաչատուր Աբովյանի տուն-թանգարանի նախաձեռնությամբ և «Էյ Թի Փի» բարեգործական հիմնադրամի աջակցությամբ նոյեմբերի 26-ին Աբովյանների տոհմական տան այգում տեղի ունեցավ աշնանային ծառատունկ՝ նվիրված 2019 թվականի հոբելյաններին։ Անվանական տնկիները տեղադրեցին հոբելյարների ժառանգները, նշանավոր մտավորականներ, գրողներ, արվեստագետներ: Թանգարանի այգում տնկվեցին՝ Կոմիտասի, Հովհաննես Թումանյանի, Երվանդ Օտյանի, Լևոն Շանթի, Ակսել Բակունցի, Երվանդ Քոչարի, Սիլվա Կապուտիկյանի, Գևորգ Էմինի, Հրաչյա Հովհաննիսյանի, Սերգեյ Փարաջանովի, Պարույր Սևակի, Շարլ Ազնավուրի, Սոս Սարգսյանի, Խաչատուր Աբովյանի և Ռուբեն Հովսեփյանի անվանական ծառերը։ Խաչատուր Աբովյանի տուն-թանգարանի տնօրեն Սյուզաննա Խոջամիրյանը շնորհակալություն հայտնեց ծառատունկի մասնակիցներին այս նախաձեռնությանն արձագանքելու համար և նշեց, որ այս քայլով սկիզբ է դրվում Աբովենց տունը կրկին մտավորականության հավաքատեղի դարձնելու նախաձեռնությանը։ Հաջորդ տարվանից Աբովենց այգում կկազմակերպվեն գրական ընթերցումներ, կգործի բացօթյա գրադարան և այցելուները կարող են իրենց հանգիստը անցկացնել Երևանի ամենահին տներից մեկի այգում՝ ընթերցելով հայ և համաշխարհային գրողների ստեղծագործությունները։ Համազգային հայ կրթական և մշակութային միության Երևանի գրասենյակի կողմից Խ. Աբովյանի տուն-թանգարանի գրադարանին հանձնվեցին Համազգայինի հրատարակած գրքերը։ Ծառատունկի մասնակիցները խոստացան պարբերաբար այցելել թանգարան, խնամել իրենց տնկած ծառերը։
