Sorry, this entry is only available in Հայերեն. For the sake of viewer convenience, the content is shown below in the alternative language. You may click the link to switch the active language.
ԸՆՏԱՆԵԿԱՆ ՋԵՐՄ ՄԻՋԱՎԱՅՐ ՏՈՒՆ-ԹԱՆԳԱՐԱՆՈՒՄ…
Նոյեմբերի 17-ին տուն-թանգարանում «Ընտանիքի տարի» ծրագրի շրջանակներում տեղի ունեցավ «Աբովյանի ընտանեկան մոդելը» խորագրով միջոցառում: Միջոցառումը անցկացվեց թեյի սեղանի շուրջ, մտերմիկ, ջերմ, ընտանեկան միջավայրում: Իրենց ներկայությամբ մեզ պատվեցին Արգավանդի Ս. Սարգիս եկեղեցու քահանա տեր Գրիգորը, կինը՝ տիկին Անահիտը և նրանց յոթ որդեգիր երեխաներից երկուսը: Ինչպես նաև ներկա էր թանգարանի լավ բարեկամ, Խ. Աբովյանի անվ. ՀՊՄՀ-ի աշխարհագրության և նրա դասավանդման մեթոդիկայի ամբիոնի դոցենտ, Մանկավարժական գիտությունների թեկնածու Սիմա Դայանը իր ուսանողների հետ: Միջոցառումը սկսվեց թանգարանի տնօրեն Վ. Քոսակյանի բացման խոսքով: Իր խոսքում տնօրենը ընդհանուր գծերով անդրադարձավ ընտանիք հասկացությանը: Ներկաներին ողջունեց նաև ցուցադրությունների կազմակերպման և հանրահռչակման բաժնի վարիչ Ա. Ստամբոլցյանը, խոսեց «Ընտանիքի տարի» ծրագրի և ընտրված խորագրի մասին, որից հետո խոսքը տրվեց տեր Գրիգորին: Տեր հոր խոսքով բոլոր մասնակիցները «Հայր Մերը» ասացին, որից հետո լսեցինք տեր Գրիգորի հետաքրքիր մեկնաբանությունները ընտանիքի մասին, ինչպես նաև աստվածաշնչյան մեջբերումներ, իմաստուն խորհուրդներ և հորդորներ: Ներկաներին խորապես տպավորեց տեր Գրիգորի ելույթը: Հաջորդիվ թանգարանի աշխատակիցների կողմից քննարկվեց Աբովյանի առաջադրած ընտանեկան մոդելի գաղափարը: Ա. Ստամբոլցյանը խոսեց Աբովյանի ապրած ժամանակաշրջանի ընտանեկան կյանքի, ընդունված սովորույթների, բարքերի մասին, այնուհետև անդրադարձավ Աբովյանի «Պատմություն Տիգրանի» մանկավարժական վեպին, որտեղ հեղինակը առաջադրել է ընտանեկան մոդելի մի գաղափար, որը միանգամայն նորություն էր 19-րդ դարի հայ իրականության մեջ: Վեպին առավել մանրամասն անդրադարձավ ֆոնդապահ Մ. Բաղդասարյանը: Միջոցառումն ամբողջությամբ ընթացավ ջերմ, մտերմիկ և հոգևոր մթնոլորտում: Խ. Աբովյանի տուն-թանգարանը իր խորին շնորհակալությունն է հայտնում տեր Գրիգորին՝ իր բազմախորհուրդ, խորիմաստ և ուսանելի զրույցի համար:
