ՈւՂԵՎՈՐՈՒԹՅՈՒՆ ԴԵՊԻ ԱՆԻ

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

2-րդ փուլ
***********
Հոկտեմբերի 31-ին «Ուղևորություն դեպի Անի» մեծահասակների կրթական ծրագրի մասնակիցները տուն-թանգարանի աշխատակիցներ Ս. Ավոյանի, Ա.Ստամբոլցյանի, Ն. Դանիելյանի և զբոսավար Արմեն Երանոսյանի հետ ուղևորվեցին դեպի Անիպեմզա: Ուղևորության մեկնակետը Քանաքեռի Խ. Աբովյանի տուն-թանգարանն էր: Ճանապարհն անցավ Երևան-Արմավիր-Վաղարշապատ-Մեծամոր-Սարդարապատ-Արթենի-Արագած-Անիպեմզա երթուղիով: Ուղևորությունն ամբողջությամբ ուղեկցվեց արհեստավարժ և հմուտ զբոսավար Արմեն Երանոսյանի բացատրություններով: Մեր մասնակիցները ծանոթացան նշված և այցելած վայրերի պատմությանը, գիտական և կրթական ձեռքբերումներին, էթնոքաղաքական և էթնոմշակութային որոշ մանրամասներին, էկոլոգիային, երկրագիտական և աշխարհագրական տվյալներին, հայկական ճարտարապետության դրվագներին, եկեղեցու և կրոնի պատմությունից հետաքրքիր մանրամասներին, տնտեսությանը, գյուղատնտեսությանը, բուսականությանը: Առաջին կանգառը՝ Էջմիածնի Մայր Տաճարն էր: Մեր տարեցները այցելեցին Էջմիածնի Մայր Տաճարի թանգարան: Այստեղ նրանք ծանոթացան թանգարանում պահվող սրբազան մասունքներին և կրոնական արվեստի ուրույն նմուշներին: Երկրորդ կանգառը՝ Սարդարապատի հերոսամարտի հուշահամալիրն էր, Հայոց ազգագրության և ազատագրական պայքարի պատմության ազգային թանգարանը: Մեր մասնակիցները ծանոթացան 1918թ. մայիսյան հերոսամարտերի պատմությանը, հերոսներին, առաջին հանրապետության ստեղծմանը: Ուրախ երգերի և ասմունքների ներքո մեր մասնակիցները հասան վերջին կանգառին՝ Անիպեմզայում գտնվող Երերույք տաճարին: Զբոսավարը ամենայն մանրամասնությամբ ներկայացրեց տաճարի պատմությունը, ճարտարապետությունը, դերն ու նշանակությունը: Երերույքը իր ամբողջ համայնապատկերով առեղծվածային խորհրդավորություն էր հաղորդում: Մեծ խորանը՝ բաց երկնքի տակ, խորանի երկու փոքր սենյակներում դրված սրբապատկերները: Տաճարի պատերից դուրս՝ համայնապատկերում՝ մեկ այլ առեղծված: Եկեղեցու շուրջ քարանձավներ են, մի քիչ ներքևում ՝ գետնի տակից կիսով չափ դուրս եկած մեկ այլ շինություն: Իսկ ավելի հեռվում նշմարվում է Տիգրան Մեծի կառուցած ջրամբարի պատնեշը և մի ամբողջ բնակավայր: Աննկարագրելի էր մեր տարեցների ուրախությունն ու ոգևորությունը, և միաժամանակ այն մեծ հուզմունքը, որ փոխանցել էր նրանց առեղծվածային տաճարը:
Վերադարձի ճանապարհին մեր մասնակիցները խոսեցին իրենց տպավորությունների մասին, երախտագիտության և գոհանակության մեծ զգացումով արտահայտվեցին ծրագրի կազմակերպիչների և իրականացնողների մասին: Եվ իրականում, այս ուղևորությունը եզակի հնարավորություն էր մեր տարեցների համար նորովի բացահայտելու Հայաստանի որոշ անկյուններ:
Խ. Աբովյանի տուն-թանգարանը իր խորին շնորհակալությունն է հայտնում Թանգարանային կրթության կենտրոնին և նրա գործընկերներ՝ Դի-Վի-Վի Ինթերնեյշնալ կազմակերպությանը և Թանգարանների աշխատողների և բարեկամների ասոցիացիային՝ հնարավորություն ընձեռելու նմանատիպ կրթական ծրագիր իրականացնելու համար, ինչպես նաև «World tour» տուրիստական ընկերությանը՝ ուղևորությունը բարձր մակարդակով իրականացնելու համար և զբոսավար Արմեն Երանոսյանին՝ կատարած բարձրակարգ աշխատանքի համար: